Ölkəmizdə YDM sahəsində marketinq keyfiyyəti - ARAŞDIRMA

⛽ Benzini hardan vurursunuz: Azpetrol, SOCAR, yoxsa Lukoil?

Azərbaycanda YDM seçimi avtomobil markası seçimi qədər emosional olur. Sürücülər bərbərlərinə necə sadiq qalırsa, eyni şəkildə illərlə yalnız bir məntəqədən yanacaq alır.

Hətta favorit seçənlər rəqib brend haqqında “Orda benzinə su qatırlar” kimi söz-söhbətlər yayır.

Halbuki reallıqda əksər sürücülər həyatlarının müəyyən dönəmində Azpetrol, Lukoil və SOCAR-ın hər üçünün yanacağından istifadə edib. Bu isə göstərir ki, rəqabət “qarşı tərəfi tam inkar”la deyil, müştəriyə fərqli təcrübə yaşatmaqla qazanılmalıdır.

Araşdırmam göstərdi ki, bu 3 markadan biri sosial medianın gücünü davamlı və düzgün istifadə etsə, digərlərini rahatlıqla geridə qoyub bazarda müştəri sadiqliyini öz tərəfinə çəkə bilər. Amma ya etmirlər, ya da edə bilmirlər.

Yanacaq sürücülərin zəruri ehtiyacları olduğuna və rəqabətcil 3 brend olduğuna görə, Google ADS, SEO, E-mail marketing kimi kampaniya ehtiyac yoxdur. Amma və lakin sosial şəbəkələr vasitəsilə, xüsusilə də İnstagram ilə yaxşı mənada fərqlənmək, bağ qurmaq və sürücüləri brendə sadiqliyə çağırmaq mümkündür.

Hər 3 brendin sosial şəbəkə hesablarını təhlil etdim:

Azpetrol Ltd. LLC - digər brendlərə nisbətən daha canlıdır, lakin 'hər şeydən bir az' paylaşım strategiyanı pozur. Sürücü bütün xüsusi günlərdə post paylaşan YDM-ni niyə izləsin ki?

LUKOIL - səhifədə informativ paylaşımlar edilir, bu da izləyici cəlb edən addım deyil.

SOCAR Petroleum - rəsmiyyətdən kənara çıxılmadığına görə, izləyici üçün maraqlı deyil.

Bəs necə etmək olar?

İlk növbədə sosial şəbəkə hesablarında rəsmiyyətdən çıxıb sürücü dostu brendə çevrilmək lazımdır. Paylaşımlar sürücülərdən, maşınlardan, yanacaqlardan, uzun yollardan və buna oxşar maraq dairələrindən olmalıdır ki, sürücü onsuz da benzini alır, heç olmasa sosial şəbəkədən hər gün yeni nəsə öyrənməklə nəsə qazanmış olsun.

Maraqlı rubrikalar yaratmaqla insanları hər gün sosial şəbəkəyə qaytarmaq və onları brendlə emosional bağlamaq mümkündür; məsələn, sürücülərin uzun yol təcrübələri, maraqlı hadisələr və yol təhlükəsizliyi məsləhətləri, sadə və praktik avtomobil qulluq tövsiyələri, yanacağın avtomobilə təsiri və yanacaq qənaəti yolları, real istifadəçilərin təcrübələri və brendlə bağlı xatirələri, sosial mediada keçirilən müsabiqələr, endirimlər və kampaniyalar, həmçinin yanacaq sərfiyyatının azaldılması və ətraf mühitin qorunması mövzularında paylaşımlar vasitəsilə brendlər sadəcə yanacaq satıcıları deyil, sürücülərin gündəlik həyatının bir hissəsinə çevrilə bilər.

YDM məntəqələrində it və pişiklər üçün evlər düzəltməklə həm sosial məsuliyyəti artırmaq olar, həm də heyvansevər sürücülərin sosial şəbəkələrdə dəstək məqsədli paylaşımlarını artırmaq olar. 

Və ən sonda hər gün təsadüfi 1 sürücüyə 20 AZN-lik (məbləğ şərtidir) benzin hədiyyə etməklə sürücülərin yolunu buradan salmaq olar.

Təbii ki, sadaladıqlarım səthi yanaşma ilə gəldiyim nəticələrdir. Daha detallı araşdırma və strategiya ilə daha çoxunu etmək olar.