Geniş filial şəbəkəsinə malik şirkətin neçə “Instagram” hesabı olmalıdır?

Azərbaycanda geniş filial şəbəkəsinə malik şirkətin vahid “Instagram” hesabı olmalıdır, yoxsa hər filial üçün ayrıca hesab yaratmaq daha effektivdir?

Brend bir orkestr kimidir. Müxtəlif alətlər fərqli səslər çıxarır, amma hamısı eyni dirijorun rəhbərliyi altında ifa etdikdə musiqi yaranır. Əgər hər alət öz ritmini seçsə, artıq musiqidən yox, səs-küydən danışırıq.

Multi-filial şirkətlərdə “Instagram” hesabları da bu prinsipə tabedir. Filiallar fərqli ola bilər, amma onların rəqəmsal səsi vahid brendi təmsil etməlidir.
 

Əgər bütün filiallar eyni xidmət standartını, eyni dəyərləri və eyni brendi təmsil edirsə, onları fərqli rəqəmsal kimliklərə bölmək əksər hallarda strateji üstünlük yaratmır.

 

Ən uğurlu multi-filial şirkətlər əvvəlcə əsas brendi gücləndirirlər. Çünki vahid hesab böyüdükcə hər paylaşım bütün filiallara eyni vaxtda dəyər qazandırır. Bakı filialı haqqında paylaşım Gəncədə, Sumqayıtda və ya Lənkəranda yaşayan potensial müştərinin də qarşısına çıxır. Bu, ayrıca hesablarla əldə edilməsi çətin olan miqyas effekti yaradır. 

Vahid hesabın ən böyük üstünlüyü resursların mərkəzləşdirilməsidir. Bütün izləyicilər bir səhifədə toplanır, bütün reklam büdcəsi eyni hesabı böyüdür, kontent vahid strategiya ilə idarə olunur və bütün metrik göstəricilər (izləyici sayı, paylaşımlar, rəylər və engagement) bir nöqtədə cəmlənir. Nəticədə istifadəçi ayrı-ayrı filialları deyil, bütöv brendi tanıyır və ona etibar formalaşdırır.

Bundan əlavə, “Instagram” alqoritmi yüksək qarşılıqlı əlaqə göstərən hesabları daha çox istifadəçiyə təqdim etməyə meyillidir. Auditoriyanı bir neçə hesaba bölmək “engagement” göstəricilərini də bölür. Vahid hesab isə bütün paylaşımların eyni izləyici bazası ilə qarşılıqlı əlaqəsini artıraraq üzvi əhatəni gücləndirə bilər.

Hər filial üçün ayrıca hesab yaratmaq müəyyən üstünlüklər təqdim edə bilər. Lokal tədbirləri, regional kampaniyaları, filial əməkdaşlarını və yerli müştəri hekayələrini paylaşmaq daha asan olur. Lakin bu üstünlüklər ayrıca hesab açmaq üçün kifayət qədər əsas yaratmır.

Ayrıca hesab yalnız xüsusi hallarda məqsədəuyğundur. Məsələn, filiallar fərqli xidmət istiqamətlərinə malikdirsə, müxtəlif auditoriyalara müraciət edirsə, müstəqil marketinq komandası və ayrıca reklam büdcəsi ilə fəaliyyət göstərirsə və ya brend strategiyası bunu tələb edirsə. Bu şərtlər yoxdursa, ayrıca hesablar faydadan çox idarəetmə yükü yaradır.

Məsələn, restoran şəbəkəsinin Bakı, Gəncə və Lənkərandakı filialları eyni menyu və eyni konseptlə fəaliyyət göstərirsə, onların ayrıca “Instagram” hesablarına ehtiyac yoxdur. Ancaq Balakən filialı bölgəyə məxsus yerli mətbəxi ön plana çıxarır, fərqli menyu təqdim edir və məhz bu təcrübəni axtaran qurman auditoriyasına xitab edirsə, ayrıca hesab strateji baxımdan əsaslandırılmış qərar ola bilər. Çünki bu halda filial artıq eyni xidmət nöqtəsi deyil, fərqli məhsul və fərqli auditoriya üçün ayrıca kommunikasiya tələb edən bir biznes vahidinə çevrilir.

Başqa sözlə, ayrıca “Instagram” hesabı coğrafiyaya görə deyil, fərqlənən dəyər təklifinə görə yaradılmalıdır.

 

Məhz buna görə eyni brend altında fəaliyyət göstərən şirkətlər, BOKT-lər, klinika şəbəkələri, təhsil müəssisələri və digər multi-filial bizneslər üçün tövsiyə olunan yanaşma bir əsas “Instagram” hesabıdır. Filialların fəaliyyəti isə “Highlights”, geolokasiya paylaşımları, “Stories” və lokal kontent vasitəsilə rahat şəkildə təqdim edilə bilər.

Əgər bunun əksini tələb edən güclü biznes səbəbi yoxdursa, brendi parçalamağa ehtiyac yoxdur. 

Bir hesab. Güclü. Vahid. Keyfiyyətli.

Əgər biznesiniz bir brend kimi böyümək istəyirsə, rəqəmsal mühitdə də bir brend kimi görünməlidir. “Instagram”da məqsəd filialları böyütmək deyil, brendi böyütməkdir. Güclü brend isə bütün filialları birlikdə gücləndirir.