İşçilər üçün müjdə: Məzuniyyətdə maaş azalmayacaq!

Məzuniyyət dövründə əməkhaqqı ilə bağlı yeni qaydalar tənzimlənir. 

Belə ki, Əmək Məcəlləsinə ediləcək yeni dəyişikliklər məzuniyyətə çıxan işçilərin maaşlarının daha ədalətli şəkildə ödənilməsini nəzərdə tutur. Yeni qaydaya əsasən, işçi məzuniyyətdə olduğu müddətdə aldığı əməkhaqqı onun sonuncu aldığı maaşdan az olmamalıdır. Yəni məzuniyyətə çıxmaq işçinin gəlirinin azalmasına səbəb olmamalıdır.

Milli Məclisin müvafiq komitə iclasında bu məsələ müzakirə olunarkən bildirilib ki, məqsəd mövcud qanunvericilikdəki boşluqları aradan qaldırmaq və işçilərin sosial hüquqlarını daha yaxşı qorumaqdır.

Dəyişikliklərdən biri Əmək Məcəlləsinin 120-ci maddəsi ilə bağlıdır. Bu maddə yeni redaksiyada təqdim olunur və 46 təqvim günü məzuniyyət hüququ olan xüsusi xidmətli işçilərin siyahısı yenilənir.

Digər mühüm yenilik isə gender bərabərliyi ilə bağlıdır. Belə ki, uşağın doğulması ilə əlaqədar olaraq atalara da ödənişli məzuniyyət hüququ verilir. Məzuniyyət dövründə əməkhaqqı ilə bağlı  yeni qaydaya əsasən, tibb müəssisəsinin arayışı ilə kişilərə doğuşdan əvvəl və sonra olmaqla ümumilikdə 14 təqvim günü ödənişli məzuniyyət veriləcək. Bu dəyişiklik Əmək Məcəlləsinin 125-ci maddəsinə əlavə olunur.

Bundan əlavə, təcrübədə tez-tez rast gəlinən uyğunsuzluqların aradan qaldırılması üçün 177-ci maddədə də dəyişiklik edilir. Əgər işçi qismən ödənişli sosial məzuniyyətdədirsə, işəgötürənin təşəbbüsü ilə ödənişsiz məzuniyyətdədirsə və ya işçinin günahı olmadan iş dayanıbsa, bu zaman hesablanan birgünlük əməkhaqqı sonuncu birgünlük maaşdan az olarsa, həmin sonuncu maaş əsas götürüləcək.

Sadə dillə izah etməli olsaq, bu dəyişikliklər işçilərin məzuniyyət dövründə maddi baxımdan zərər görməməsinə, həmçinin ailə və sosial hüquqların daha yaxşı qorunmasına xidmət edir.