Bakı Ürək Günləri IX Beynəlxalq Konqresi

  Ümummilli Lider Heydər Əliyevin səhiyyə siyasətinin məntiqi davamı kimi Prezident İlham Əliyevin bu sahəyə xüsusi diqqət yetirməsi ölkədə kardiologiyanın və ürək-damar cərrahiyyəsinin belə sürətli inkişafına imkan yaradıb. Kardiologiya və ürək-damar cərrahiyyəsinin inkişafına böyük töhfə olan bu konqreslərə beynəlxalq ictimaiyyətin marağının artması bizim doğru yolda olduğumuzu göstərir.

 

  Biz konqresin proqramını hazırlayarkən həm də kardiologiya və ürək-damar cərrahiyyəsinin ən mübahisəli problemlərini əhatə etməyə və konqresin yüksək elmi-praktik səviyyədə keçirilməsinə çalışmışıq. Ənənəvi olaraq həm yerli, həm də xarici mütəxəssislər öz məqalə və tezislərini elektron şəkildə göndərə biləcəklər. Bu tezislər konqresin xüsusi elektron kitabçasında çap olunacaq və bütün iştirakçılar üçün əlçatan olacaq. Dünyanın ən görkəmli mütəxəssisləri ilə birgə aparacağımız mübahisəli xəstələr üzərində cərrahiyyə əməliyyatlarının canlı yayımlanması “Bakı Ürək Günləri” Beynəlxalq Konqresinin elmi-praktik əhəmiyyətini artıracaq. İnanıram ki, praktiki kurslar da gənc həmkarlarımız üçün xüsusilə faydalı olacaq.

 

 Eyni zamanda, bu konqres azərbaycanlı mütəxəssislərə kardiologiyanın ən son nailiyyətlərini dünyanın aparıcı mütəxəssisləri ilə müzakirə etməyə imkan verəcək. Sosial proqramımız vasitəsilə xarici qonaqlarımız Azərbaycanın zəngin tarixi və mədəni irsi ilə tanış olmaq şansı əldə edəcəklər. Azərbaycan Ürək və Damar Cərrahiyyəsi Cəmiyyətinin fəxri sədri kimi həm şəxsən, həm də konqresin təşkilat komitəsinin üzvləri adından kardiologiya və ürək-damar cərrahiyyəsi üzrə həmkarlarımı 2025-ci ilin may ayında keçiriləcək “Bakı Ürək Günləri” 9-cu Beynəlxalq Konqresinə dəvət edirəm. 

 

 Bakıda görüşməyi səbirsizliklə gözləyirəm. 

 

 Prof.Dr. Kamran Kazımoğlu MUSAYEV 

 AÜDCC-nin fəxri sədri