Diplomatiya masasında marketinq həmləsi

22-25 sentyabr BMT Baş Assambleyasında onlarla lider, yüzlərlə görüş, böyük çıxışlar fonunda diqqətimi çəkən bir şey oldu: Prezident İlham Əliyevin Nyu-Yorkdakı görüşlərinin masalarında bir brend daim gözə dəyirdi - Sirab və İstisu.

Təsəvvür edin, dünyanın ən böyük investisiya fondlarının rəhbərləri, dövlət başçıları, diplomatiyanın ən nüfuzlu fiqurları ilə bir masa arxasında oturursunuz və hər foto, hər kadrda eyni brend görünür.

İlk baxışdan protokol elementi kimi görünə bilər. Amma marketinq baxımından bu, olduqca dəyərli bir strateji brendinq addımıdır.

Bu addım brendə nə qazandırır?

Marketinq baxımından burada 4 böyük dəyər var:

1. Brendin dövlətlə assosiasiyası
• Bir brendin yüksək səviyyəli diplomatik görüşlərdə təqdim olunması, onu sıradan istehlak məhsulundan çıxarır və “rəsmi keyfiyyət simvolu” statusuna gətirir. Bu, həm daxili, həm də xarici bazarda güclü mövqelənmədir.

2. Premium imic və prestij
• Prezidentin görüş masasında təqdim olunan brend istehlakçı şüurunda avtomatik “elit seçim” statusu qazanır. Yerli bazarda bu, HORECA seqmenti üçün cəlbedici olur.

3. Storytelling potensialı
• Sabah Sirab və İstisu rahatlıqla “Azərbaycan diplomatiya masasında təqdim olunan su” deyə bilər. Bu, heç bir reklam büdcəsinin almadığı gücdür: həm milli brend imici, həm də ixrac bazarlarında güclü satış arqumentidir.

4. İxrac referansı
• Beynəlxalq görüşlərdə iştirak edən hər qonaq bu saları dadır və ölkəni həmin brendlə yadda saxlayır. Bu, gələcəkdə investisiya və ixrac fürsətlərində “diplomatik referans” rolunu oynayır.

Beynəlxalq arenada bənzər addımlar olubmu?
• Evian (Fransa) - prezident sarayında təqdim olunmağa başladıqdan sonra dünyada “premium su” kimi tanındı.
• Borjomi (Gürcüstan) - dövlət protokolunun bir parçasına çevrilərək milli qürur simvolu oldu.
• FIJI Water (ABŞ) - siyasi və biznes tədbirlərində görünərək sadə sudan “elit status simvoluna” qalxdı.

Onların hekayəsi göstərir ki, bəzən milyonluq reklam büdcəsinə ehtiyac yoxdur. Sadəcə doğru yerdə, doğru masada olmaq kifayətdir. Sirab və İstisu indi həmin fürsəti yaşayır. Yaxşı marketinq bunu hekayəyə çevirməyi bacarar.

Və etiraf edim, mən ''İstisu'' mineral su zavodu və Sirab şirkətlərinin marketinq komandalarında olsam, bunu maksimum dərəcədə kommunikasiya edərdim. Çünki hər şüşə, hər kadr, hər protokol fotonu brendin hekayəsinə çevirmək olar.